Plantun de Prouvènço

Pèr coumpara dos planto d'encò nostre

Sarcocornia fruticosa & Vicia bithynica

Engano-bouissounouso

Sarcocornia fruticosa

Amaranthaceae Chenopodiaceae

Àutri noum : Perso-pèiro, Salicor, Sausouiro, Sansouiro.

Nom en français : Salicorne en buisson.

Descripcioun :
Aquesto engano, que trachis dins li mitan sala, èi lignouso e formo de bouissoun. Se recounèis à si cimo moutudo, sis article madur mai long que larg, e à si dos pichòti lojo que soubron après la cabusso di grano (fotò). Coumpara emé Arthrocnemum macrostachyum.

Usanço :
Lis engano soun coumestiblo e se manjon en ensalado se soun pas trop duro, e peréu esboulentado, adoubado coume de baneto. Bèn li lava que pòu i'agué de parasite dangeirous (letouspiròsi dóu ragoundin e douvo dóu fege).

Port : Aubret
Taio : Pancaro entresigna
Fueio : ges
Tipe bioulougico : Faneroufite
Cicle bioulougico : Planto renadivo

Gènre : Sarcocornia
Famiho : Amaranthaceae
Famiho classico : Chenopodiaceae

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Sansouiro
Estànci : Pancaro entresigna
Couroulougi : Pancaro entresigna
Ref. sc. : Sarcocornia fruticosa (L.) A.J.Scott, 1978 (= Salicornia fruticosa (L.) L. (L.) L., 1762 )

Vesso(-de-Bitinìo)

Vicia bithynica

Fabaceae Leguminosae

Nom en français : Vesce de Bithynie.

Descripcioun :
Aquelo vesso, pulèu grando, porto de flour groupado de uno à tres, di dos coulour (blanco e vióuleto), emé un pecou mai o mens long (1 à 6 cm). Vèn bèn dins li relarg séusous. Li fueio d'en bas an un parèu de fueioun, e mai pèr li fueio d'en aut (2 à 3 parèu emé uno vediho). Li dóusso soun pelouso (de 2,5 à 5 cm). Poudès peréu aluca lis estipulo que dounon d'èr à d'alabardo.

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).